“Манас” университетин кесип өтчү жолду салуу качан башталат?

Бишкектеги Кыргыз-Түрк “Манас” университетинин кампусун кесип өтүп, Болот Миңжылкиев көчөсүн Чыңгыз Айтматов проспектисине туташтыра турган автожолду салуу бир айдын ичинде башталат. Бул тууралуу “Кабар” агенттигине берген маегинде Бишкек мэриясынын Транспорт жана жол-транспорттук инфратүзүмдү өнүктүрүү департаментинин директорунун орун басары Абдыжапаркул Жанболотов билдирди.

Анын айтымында, аталган көчө “Манас” университетинин эки корпусунун ортосунан өткөндүктөн, жер астындагы өтмөк курулат.

Ошондой эле Жанболотов белгилегендей, жолдун түштүк тарабындагы сейилдөөчү аймак азыркы абалында эле калат.

“Планда бак-дарактарды сактап калуу боюнча маселелер эске алынды”, — деди ал.