Матраимовдор журналисттерден өндүрүлгөн акчаны балдар үйүнө берет. Бул тууралуу алардын жактоочусу Татьяна Карыжинская бүгүн, 13-декабрда маалымат жыйын учурунда билдирди.
«Доо арыз боюнча 60 миллион сом өндүрүлсө, Матраимовдор акчаны балдар үйүнө беребиз деп айтышты»,-деди жактоочу.
Ал эми Матраимовдордун бул сөзү журналисттердин күлкүсүн келтирди.
Эске салсак, Бир туугандар Райымбек жана Искендер Матраимов, алардын жубайлары жана үй-бүлөлүк «Ысмайыл Матраимов атындагы фонд» сотко кайрылышкан. Алар «Матраимовдордун кадыр-баркына доо кетирген» деп «Азаттык» радиосунан, кабарчы Али Токтакуновдон, «Kloop.kg» жана 24.kg сайттарынан жалпысынан 60 миллион сом өндүрүп берүүнү өтүнүшкөн.