Президент Садыр Жапаров Кыргыз Республикасынын Президентине караштуу Виртуалдык активдер жана блокчейн технологиялар боюнча улуттук агенттигин түзүү жөнүндө жарлыкка кол койду.
Жаңы түзүм Виртуалдык активдерди жана блокчейн технологияларды өнүктүрүү боюнча улуттук кеңештин учурдагы Секретариатынын базасында түзүлөт. Агенттик виртуалдык активдер чөйрөсүндө мамлекеттик саясатты ишке ашыруу жана жөнгө салуу боюнча ыйгарым укуктуу орган болуп калат.
Жарлыкта белгиленгендей, чечим мамлекеттик органдардын ортосунда өнүктүрүү, жөнгө салуу жана контролдоо функцияларын бөлүштүрүү аркылуу бул чөйрөдөгү мамлекеттик башкаруунун натыйжалуулугун жогорулатуу максатында кабыл алынды.
Агенттикке Экономика жана коммерция министрлигине караштуу Финансы рыногун жөнгө салуу жана көзөмөлдөө кызматынын айрым ыйгарым укуктары өткөрүлүп берилет. Ведомство бир айдын ичинде жаңы түзүмгө виртуалдык активдерди жөнгө салууга байланыштуу маалыматтык системаларды, электрондук маалымат базаларын, санариптик реестрлерди, программалык-техникалык каражаттарды жана документтерди өткөрүп бериши керек.
Атап айтканда, сөз лицензиялар жана уруксат берүүчү документтер, виртуалдык активдердин эмиссиясынын мамлекеттик реестри, ошондой эле Кыргызстанда санариптик активдерди чыгаруу, жүгүртүү жана каттоо маселелери жөнүндө болуп жатат.
Улуттук агенттиктин жетекчисин өлкөнүн президенти дайындайт жана кызматтан бошотот.
Жарлык менен ошондой эле кызматкерлердин штаттык саны, эмгек акы төлөө системасы жана социалдык кепилдиктери бекитилген. Атап айтканда, жумуштун татаалдыгы жана өзгөчө маанилүүлүгү үчүн кошумча төлөмдөр, ден соолукту чыңдоо үчүн төлөмдөр, он үчүнчү айлык, ошондой эле тамак-аш жана транспорт үчүн компенсациялар каралган.
Мындан тышкары, документте агенттиктеги бош турган административдик мамлекеттик кызматтарга кызматкерлерди өзгөчө тартипте — сынак өткөрбөстөн дайындоо мүмкүнчүлүгү каралган.
Министрлер кабинетине үч айлык мөөнөттө өз чечимдерин жарлыкка ылайык келтирүү жана бардык каралган чаралардын ишке ашырылышын камсыз кылуу тапшырылды.
