Ташкенттин Үчтепа районунда бир үй-бүлөдөн беш киши эс-учун жоготкон абалда табылып, алардын үчөө каза болду. Бул тууралуу Өзбекстандын Башкы прокуратурасынын басма сөз кызматы билдирди.
16-январь күнү кечке жуук ички иштер органдарына Ташкентте жашаган 5 жаран эс-учун жоготкон абалда табылганы тууралуу маалымат түшкөн.
Тергөө тобу окуя болгон жерде 36 жаштагы эне менен 3 жаштагы кыз каза болгонун аныкташкан. Бир суткадан кийин медициналык тез жардам көрсөтүлгөнүнө карабай, үй-бүлөнүн 39 жаштагы башчысы көз жумган.
12 жаштагы жана 8 айлык эки кыз жандандыруу бөлүмүнө жаткырылды.
Башкы прокуратуранын маалыматына караганда, окуя болгон жерден ар кандай дары-дармектер, ошондой эле үй-бүлө жеген тамак-аштар алынды.
Азыр экспертиза дайындалды. Так корутунду чыккандан кийин үй-бүлө мүчөлөрү эмне себептен каза болгону белгилүү болот.
Тергөө амалдары жүрүп жатат.
