Кыргыз Республикасынын Улуттук банкынын башкармалыгы алмашуу бюролору үчүн минималдуу ички көзөмөл талаптарын белгилеген жаңы жобону бекитти. Документ акчаны адалдоого жана мыйзамсыз иш-аракеттерди каржылоого каршы күрөшүүгө багытталган.
Улуттук банктын токтомундагы негизги талаптар:
100 миң сомдон 1 млн сомго чейинки операцияларда кардардын өздүгүн аныктаган документтер (паспорт, аскердик билет, айдоочулук күбөлүк же чет өлкөлүктөр үчүн жашап туруу уруксаты) талап кылынат;
100 миң сомдон жогору операциялар сөзсүз катталат;
Айрым категориядагы кардарлардан (таанымал кыргыз жарандары, белгилүү чет өлкөлүктөр жана башкалар) каражаттын кайдан келип чыкканын тастыкташы керек;
Акча алмаштыруу жайларынын кызматкерлери кардарды Кыргызстандын жана БУУнун Коопсуздук кеңешинин санкциялык тизмесине кирген-кирбегенин текшерүүгө милдеттүү;
Тобокелдүү делген операцияларга кошумча документтер суралып, аны жүргүзүүгө акча алмаштыруу жайынын жетекчиси уруксат бериши зарыл;
Шектүү операциялар тууралуу маалымат Финансылык чалгындоо кызматына жөнөтүлүшү шарт.
Токтом 14-январдан тарта күчүнө кирет.
