Алматыда сабалган кыргызстандык жаран Чолпонбек Сыдыков өлкөгө алып келинди. Бул тууралуу Тышкы иштер министрлигинин маалымат кызматынан билдиришти.
Маалыматка ылайык, бүгүн, 20-январда Кыргызстандын Алматы шаарындагы Башкы консулдугу тарабынан Чолпонбек Сыдыков атайын медициналык унаа менен «Ак-Жол» көзөмөл-өткөрмө пунктуна чейин алып келинди.
«Аны тийиштүү медициналык мекемеге жайгаштыруу уюштурулууда», — деп билдиришти министрликтен.
Учурда министрлик Казакстан тарап менен Сыдыковго байланыштуу окуянын бардык жагдайларын тактоо жана анын ден соолугуна оор залал келтирген күнөөлүүлөрдү жоопкерчиликке тартуу боюнча тиешелүү иштерди жүргүзүүдө.
