Бишкек. 17.01. 2015. Govori.TV
«Коррупционерлерге мурдагы бийликтер атайын шарт түзүп, мүлктөрүн сатып, качып кетишине шарт түзүп беришкен. Азыркы бийлик мындайга жол бербешибиз керек, коррупционерлерди качырбашыбыз керек, анда эл кечирбейт». Бул сөздү ЖКнын ТЭЦтин маселесин караган жалпы жыйынында эл өкүлү Азиз Турсунбаев айтты.
Анын пикиринде, ТЭЦтеги коррупцияга катышы барлардын баары камалып, жегендерин мамлекетке кайтаруу керек.
“Күнөөлүүлөрдүн азыртадан мүлктөрүн убактылуу арестке коюп, тергөө иштерин тез арада жүргүзүп, жазасын беришибиз керек. Ал үчүн эч бир бийлик бутагы, биз, парламент дагы укук коргоо органдарына кедерги болбой, тескерисинче, жардам беришибиз керек. Ортого түшпөй, алардын жаза мөөнөтүн алып, мунапыска илинбей, жегенин бүт кусуп отурушун шартташыбыз керек”,-деди ал.
Эске сала кетсек, бүгүнү үчүнчү күнү парламент ТЭЦтеги авария жана модернизацияга кеткен 386 млн. доллар боюнча депкомиссиянын корутундусун талкуулап жатышат.
