«Баарын шоу кылып салды». Алмазбек Исманкулов Бейшеналиевге жооп берди

Саламаттыкты сактоо министри Алымкадыр Бейшеналиев медицина тармагын башкарууга жөндөмдүү эмес. Бул тууралуу бүгүн, 18-мартта “Көздүн микрохирургиясы” госпиталынын директору Алмазбек Исманкулов маалымат жыйынында билдирди.

«Саламаттык сактоо министрлигиндеги өзгөрүүлөр шоуго айланып кетти. Бул министрдин толук иштөө жөндөмдүүлүгү жоктугунда. Ал Конституцияны жакшы окубады окшойт, биринчи беренеде бизде конституциялык мамлекет бар деп жазылган. Бирок министр «Соттун чечимин күтпөйм, балдарды чогултуп барып талкалап салам, баарын кууп чыгам» деп жатат. Бул жол берилгис нерсе», — дейт Исманкулов.

Исманкуловдун айтымында, Бейшеналиев толук компетентсиздигин көрсөтүп жатат.

«Министр дарыгерлерди башкара албайт. Чындыгында медицина чөйрөсү жабык, алардын өзүнүн коомунда урматтуу жана сыйга татыбаган адамдары бар. Дарыгерлер үчүн Гиппократтын анты ыйык. Кыргызда жок андай салт, аксакалды сөккөн… Мындай министр мындай татаал тармакты башкара албайт», — деди ал.

Исманкулов кошумчалагандай, клиника азыркы учурда мурункудай эле иштеп жатат.

«Бүгүнкү күнгө чейин бизге министрлик тарабынан бир дагы кат келген жок. Документтин жүрүшүн, мыйзамдарды билишеби булар? Азыр биз иштеп жатабыз, операциялар жүрүп жатат. Анан эле күн сайын «мындай кылабыз, андай кылабыз» деп жатат, биздин бейтаптар да түшүнбөй калышты, ооруканага келсе болобу же жокпу.

Учурда прокуратурага кайрылдык, тергөөчүлөр менен сүйлөштүк, Жогорку Кеңешке, президентке да кайрылуу кылдык, этикасы боюнча», — деп билдирди дарыгер.

Ал белгилегендей, учурда оорукананын имаратын ижарага берүүдөгү түзүлгөн кырдаал боюнча иштер жүрүп жатат.

«Имарат мэрияга карайт, бизге бул маселени мыйзам жолунда чечип алууга мүмкүнчүлүк бергиле, мындай ызы-чууну жаратуу туура эмес. Имарат мамлекеттики жана ал ага гана калат. Биз 25 жылда бир да жолу имаратты менчикке чыгаруу тууралуу кайрылуу кылбаганыбызды мэриядан тастыкташкан. Жана белгилеп кетсем, бул имарат бизге мамлекет тарабынан жеке мамлекеттик өнөктүктүн алкагында президенттин, Саламаттык сактоо министринин, мэрдин катышуусунда берилген. Анда негизиги ой биз ижара акысын төлөө менен мекеме өзүн-өзү актап, имаратты сактап салуу болгон. Бул жылдар аралыгында биз мамлекетке миллион АКШ долларын ижара акы катары төгүп бергенбиз. Бул имарат азыр анча акча турбайт. Биз азыркы күндө мамлекетке 2,5 миллион сом ижара төлөйбүз, ал эми быйылкы жылдын жарымына чейин (2022-жылдын, 1-июнуна) алдын ала төлөм кылганбыз», — деди Исманкулов.

Буга чейин саламаттык сактоо министри Алымкадыр Бейшеналиев Алмаз Исманкуловдун менчик медициналык борборун мамлекеттик имараттан чыгаруу иши жүрүп жатканын билдирген. Исманкулов бул талапты аткарбай жатканын айтып, күч колдонууга туура келип жатканын айткан.