Өлкөбүздүн аймагында коронавирус инфекциясын жаңы жуктаргандардын саны азайбаганына байланыштуу той-мааракелерди, куран окутуу иш чараларын өткөрүүдө көзөмөлдү күчөтүү тууралуу өкмөткө сунуштама бердик. Бул тууралуу бүгүн, 26-октябрда саламаттык сактоо министри Алымкадыр Бейшеналиев билдирди.
Анын айтымында, тойлорго байланыштуу буга чейинки кабыл алынган токтом иштебей жатат.
«Илдеттин саны өсүп жатат. Той-мааракелерде ооруну жуктуруп алуу тобокелдиги жогору болгондуктан азырынча көп адамдарды чогултуп мейман күтүүгө көзөмөлдү күчөтүү тууралуу сунуштама бердик», — деди Бейшеналиев.