Казакстандын президенти Касым-Жомарт Токаев парламенттин жогорку палатасына төрага кылып Маулен Ашимбаевди дайындады. Бул тууралуу Sputnik Казакстан жазды.
Белгилей кетсек, Дарига Назарбаеванын ыйгарым укуктары 2-майда токтотулган болчу.
Жаңы дайындалган депутат буга чейин 2019-жылдан бери Казакстандын Президентинин администрациясынын жетекчисинин биринчи орун басары болуп эмгектенип жаткан.
Маулен Ашимбаев 1971-жылы Алматы шаарында туулган. 1993-жылы Киров атындагы Казак мамлекеттик университетин аяктаган. АКШда Жон Хопкинс атындагы окуу жайынан тажрыйба алган. Ошол эле мамлекеттеги Тафтс университетинде укук жана дипломатия боюнча билимин тереңдеткен.