Жаратылыш ресурстары министрлигинин экс-жетекчиси Динара Кутманованын уулу Кемелбектин Стамбулда уурдалышы боюнча факты тастыкталган жок. Аны депортациялоо маселеси чечилүүдө. Бул тууралуу ИИМдин маалымат кызматы маалымдады.
Маалыматка ылайык, 28-июнда дайынсыз жоголгон жарандын атасы тергөө кызматына арыз менен кайрылып, алардан 600 миң доллар талап кылынганын билдирген. Факты маалымат журналына катталган.
Кемелбек Кутманов 29-майда Казакстанга кеткени аныкталган. Казакстан Республикасынын Ички иштер министрлигинин маалыматы боюнча, ал ошол эле күнү Вьетнамга учуп кеткен. 13-июнда Кутманов Алматыга кайтып келип, андан кийин Москвага учуп кеткен.
КР ИИМдин Россия Федерациясындагы өкүлчүлүгү Кемелбек Кутманов 14-июнда Дубайга учуп, 19-июнда Орусияга кайтып келгендигин аныктады. Андан соң Түркияга учуп кеткен.
Маалым болгондой, Кемелбек Кутманов 10-июлда Стамбул полициясына кайрылып, уурдалганын билдирген.
«Бирок окуя учурунда түрк полициясы уурдоо фактысын тастыктаган жок», — деп белгиледи Ички иштер министрлиги.
Башкармалык УКМКнын экофонддогу коррупция фактысы боюнча кылмыш ишин жүргүзүп жатканын баса белгиледи. 13-июнь күнү кылмышка шектелип Кемелбек Кутмановдун жакын досу Х.Ш.Т. кармалган.
Белгиленгендей, бул күнү экс-министрдин уулу Кутманов Алматы аркылуу Москвага учуп, Вьетнамда досунун кармалганын билген.
Бул кылмыш иши боюнча 27-июнда Кемелбек Кутмановго КР УКМКнын мамлекеттер аралык издөө жарыяланганы көрсөтүлгөн.
«11-июлда Жаратылыш ресурстары министрлигинин мурдагы жетекчисинин уулу миграция кызматы тарабынан кармалган. Эми аны кылмыш жоопкерчилигине тартуу үчүн Кыргыз Республикасына депортациялоо маселеси чечилип жатат», — деп жыйынтыктады ИИМ.
Белгилей кетсек, буга чейин Жаратылыш ресурстары министрлигинин мурдагы жетекчиси Динара Кутманова уулу Кемелбек Стамбулда уурдалганын билдирген. Анын айтымында, алар кун катары 600 миң доллар талап кылышкан.
Бүгүн Улуттук коопсуздук боюнча мамлекеттик комитеттин басма сөз борбору Жаратылыш ресурстар министрлиги менен “Жаратылыш өнүктүрүү фонду” коомдук фондундагы коррупция боюнча козголгон кылмыш ишинин алкагында ким кармалганын жана экс-министр Динара Кутманова үй-бүлөсү менен ар кандай долбоорлордон миллиондогон каражатты мыйзамсыз короткону тууралуу маалымат тараткан.
