Күйөөсү тарабынан өлтүрүлгөн Жибек Рустемованын уулу Бекжан президент Садыр Жапаровго жана Улуттук коопсуздук боюнча мамлекеттик комитеттин башчысы Камчыбек Ташиевге кайрылган. Анын кайрылуусу соцтармак баракчасына жарыяланды.
47 жаштагы Бишкек шаарынын тургуну 23-декабрда өлтүрүлгөн. Алдын ала маалыматтарга караганда, трагедия ажырашуу процессинин жүрүшүндө болгон. Аны мурунку күйөөсү, 1977-жылы туулган, Ички иштер министрлигинин жол полициясынын мурдагы инспектору У.Б.М. травматикалык тапанча менен атып салган.
Бул кылмыш коомчулукта кеңири талкуу жаратып, азыр Улуттук коопсуздук боюнча мамлекеттик комитет иликтөө жүргүзүп жатат.
Анын артында үч уулу калды, алардын экөөсү экинчи жана үчүнчү класста окушат. Улуу уулу Бекжандын айтымында, шектүү анын өгөй атасы.
«Апам өмүр бою жөнөкөй мугалим болуп иштеп, үй-бүлөсүн, балдарын жана акыркы беш-алты жылдан бери жумушсуз жүргөн өгөй атамды жалгыз багып келген. Батир ипотека менен сатылып алынган, ал акчасын төлөп жаткан. Учурда насыянын калдыгы болжол менен эки миллион сомду түзөт, бул мен үчүн студент катары көтөрө алгыс сумма», — деди Бекжан.
Ал апасынын каза болгонунан кийин алар кирешесиз жана ипотекалык карызы менен калганын белгиледи.
«Мен учурда университетте окуйм, бирок окуумду үзгүлтүккө учуратып, жумуш табууга аргасызмын», — деди ал бийликтен жардам сурап.
