Казакстандын бийлиги зилзаладан жабыркаган Ооганстанга жардам жөнөтүү үчүн мамлекеттик материалдык резервден тамак-аш, кийим-кече, чатырларды жана төшөнчүлөрдү бөлдү.
«Жалпысынан 1 659 тонна көлөмүндө жүк бар. Дары-дармектер жана чатырлар Улуттук гвардиянын учактары менен жөнөтүлдү», — деп айтылат Казакстандын Өзгөчө кырдаалдар министрлигинин маалыматында.
Калган гуманитардык жардамды темир жол аркылуу жеткирүүнү пландап жатышат.
Ооганстанга жөнөтүлүүчү дары-дармектерди «СК Фармация» ишканасы бөлүп берген.
Бир күн мурда Казакстан ӨКМи Ооганстанга куткаруучуларды жөнөткөн. 45 кишиден турган топтун курамында куткаруучулардан тышкары кинологдор жана дарыгерлер бар.
7-октябрда Ооганстандын батышындагы Герат провинциясында күчү 6,3 баллга жеткен жер титирөө болгон. Зилзала 2 445 адамдын өмүрүн алганын «Талибан» өкмөтү түзгөн табигый кырсыктарды башкаруу бөлүмү билдирген.
Дагы эки миңден ашуун адам жаракат алган.
