Казакстандын ички иштер министри Марат Ахметжанов Өзгөчө кырдаалдар министринин мурдагы жетекчиси Юрий Ильинге карата Абай районундагы өрткө байланыштуу тергөө иштери башталганын билдирди.
“Президент Башкы прокурорго тапшырма берди, анын алкагында текшерүү жүргүзүлөт. Өрт фактысынын өзү – өзгөчө кырдаал, адамдар каза болду, андыктан кылмыш ишинин алкагында текшерүү болот: эмне үчүн өз убагында чара көрүлгөн эмес, балким шалаакылык, балким кызматтык милдеттерин так аткарган эмес”, — деген министр.
Ошондой эле, Ахметжановдун айтымында, азыр Ички иштер министрлиги өрттүн үч версиясын карап жатат: өрт коюу, шалаакылык жана чагылган тийүү. Бөлүмгө иликтөө жүргүзүүгө эки ай убакыт берилди.
Өткөн аптадан бери Казакстандын чыгышындагы Абай облусундагы «Семей Орманы» коругунда миңдеген гектар токой күйүп жатат. Абай аймагындагы өрттөн 14 адам каза болду. Бул үчүн Казакстандын президенти Касым-Жомарт Токаев өзгөчө кырдаалдар министри Юрий Ильинди кызматтан алды. Абай районунун акими Нурлан Уранхаевге сөгүш жарыяланды.
Абай районунун акимчилигинин маалыматы боюнча 13-июнга карата өрттүн жалпы аянты 60 миң гектарга жетти. Азыр токойдогу өрттү өчүрүү үч багытта уланууда.
Учурда өрттү өчүрүүгө 1788 адам, 345 техника жана 15 тик учак тартылган.
