Министр Бейшеналиевдин отставкасы талап кылынды

Балдар фондунун Камкорчулар кеңешинин мүчөсү Галина Куликова саламаттыкты сактоо министри Алымкадыр Бейшеналиев жасаган мыйзам бузууларга чара көрүү өтүнүчү менен бийликке кайрылды. Ал бул тууралуу Бишкекте өткөн маалымат жыйында билдирди.

Анын айтымында, алар буга чейин Бейшеналиевдин аракеттери боюнча бийликке кайрылганын эске салып, бирок бүгүнкү күнгө чейин жооп боло электигин айтты,

«Мен бул жерге президент Жапаровдон, компетенттүү органдардын жетекчилеринен сурайын, кайрылуу жасайын деп келдим. Бейшеналиев уюштурган, мамлекеттик кызматкердин этикасынын нормалары, ар-намыс түшүнүгү, намыс түшүнүгү жок болгон бул аракеттерди токтотуп койгула. Ким жаргонду колдонуп, өлкөнүн ардактуу инсандарын кемсинтип жатат? Маданият ишмерлери, илимпоздор, илим үчүн жанын берген адамдар кол койгон кайрылууга эмне үчүн эч ким көңүл бурган жок», — деди Куликова.

Ал бийликтин унчукпай турганын «Алымкадыр Бейшеналиев көрсөткөн маскарачылык менен макул болгондугунун белгиси» деп бааласа болот.

«Бейшеналивдин Акрамовдон кечирим суроонун кереги жок. Алымкадыр Бейшеналиев Эрнст Акрамовдун жанында турганга да татыксыз. Министрди ээлеген кызматынан бошотууну талап кылабыз. Андай адамдардын мындай кызматты ээлегенге акысы жок», — дейт Галина Куликова.

Саламаттык сактоо министри Алымкадыр Бейшеналиев 14-мартта Эрнст Акрамов жетектеген Чүй облустук ооруканасындагы калыбына келтирүүчү хирургия илимий институту жабылганын билдирген. Аны жетектеп келген 85 жаштагы Акрамов кызматтан алынганын, мекемеге жаңы башкы дарыгер дайындалганын кошумчалаган.

15-мартта Улуттук госпиталда травматология бөлүмүн ачып жатып, Акрамовду сындап, ал ооруканага атын берүүгө татыктуу эмес экенин айткан.

Ушундан кийин бир катар коомдук ишмерлер, илимпоздор, дарыгерлер жана искусство өкүлдөрү Эрнст Акрамовдун ар-намысын коргоо штабын түзүшкөн.

Эрнст Акрамов министр менен жеке тааныш эмес экенин, мурда аны менен иштешпегенин айткан.