Орусиянын энергетика министри Сергей Цивилев Москвада биринчи вице-премьер-министр Данияр Амангелдиев жана энергетика министри Таалайбек Ибраев менен жолугушту. Жолугушууга «РусГидро» ААК өкүлдөрү жана сүрөттөргө караганда, «ТНК Дастан» ААКсынын мурдагы башкармалыгынын төрагасы Алексей Ширшов да катышты.
Орусиянын Энергетика министрлигинин 16-февралда министрликтин веб-сайтында жарыяланган маалыматына ылайык, тараптар электр энергетикасы тармагындагы кызматташууну талкуулашты. Тактап айтканда, Жогорку Нарын ГЭС каскады боюнча кызматташууга байланыштуу маселелерди чечүүнү талкуулашкан. Жолугушуунун катышуучулары долбоордун кийинки кадамдарын белгилеп, бул долбоордун үстүндө иштөөнү улантууга макулдашышты.
Андан тышкары, алар отун-энергетика тармагы үчүн тармактык заказды түзүү боюнча эки тараптуу кызматташууну талкуулашты.
Белгилей кетсек, Министрлер Кабинети да, Кыргызстандын Энергетика министрлиги да бул жолугушуу тууралуу эч кандай маалымат беришкен эмес.
