«Найман эне» спектакли Москва шаарында коюлат

13 Тогуздун айы 2018 15:09 Бишкек Govori.TV

Бишкек. 13.10.2018.Govori.TV

Кыргыз мамлекеттик Муса Жангазиев атындагы куурчак театры 23-сентябрда 80-театралдык сезонун ачкан эле. Буга удаа эле 28-сентябрда “Найман эне” (орус тилинде:“Легенда о птице Доненбай”) аттуу спектаклинин бет ачарын өткөрүп, жеткинчек күйөрмандарына сунушташкан болчу. Ушул эле спектакль менен жеткинчектер Москвада өткөрүлүп жаткан фестивалга аттанып кетишти. Бул тууралуу аталган театрдын кызматкери Алеся Раимкулова Govori.TV мультимедиялык маалымат агенттигине кабарлады.

«Театырыбыз дал ушул спектакль менен кечээ 12-октябрда Москва шаарында өтүп жаткан Шериктеш өлкөлөрдүн “IX Эл аралык куурчак театр фестивалына” катышуу үчүн жөнөп кетишти. Бул фестивалга он чакты өлкөнүн куурчак театрлары чакырылган.

“Куурчак театры – бул билим берүүнүн жана балдарды тарбиялоонун бир бутагы. Искусствонун бул түрүн алып кете алган артисттер чанда гана. Ага жан берүү, эмоция берүү, бөбөктөрдү ишендирүү, кыймылдатуу — мунун баары бир учурда болгондуктан, артисттен чеберчиликти, ийкемдүүлүктү, элпектикти, кубулуп туруучу үндү талап кылат. Ал эми Москвада өтүп жаткан фестивалда катышуу үчүн негизги талап катары, 10 жаштан жогоркуларга катышуу сунушталган. Арасында 14-16 жаштан жогоркулар катышчу спектаклдер да бар.
Фестивалда коюлучу спектакль – Улуу жазуучубуз Ч.Айтматовдун терең философиядагы “Кылым карытар бир күн” романынан алынган бир үзүм баян болот. Инсценировкасын иштеп чыккан Бакы Өмүралиев, койгон режиссер – Казахстан Республикасынын Эмгек сиңирген ишмери – Бекпулат Парманов, сүрөтчүсү – Юлдаш Нурматов, музыкасын жазган – Ырысбек Усманов» -деди Алеся Раимкулова.