ЖЭБге тендерсиз сатылып алынган көмүр боюнча кылмыш иши козголгону айтылды

УКМКнын Бишкек шаары боюнча башкармалыгы Бишкек ЖЭБине 2023-2024-жылдарга жылуулук берүү мезгилине көмүр сатып алуу фактысы боюнча кылмыш ишин козгоду. Бул тууралуу Kaktus.media сайты укук коргоо органдарындагы булактарына таянып жазды.

Маалыматка ылайык, кырсык болоордон бир күн мурун мамлекеттик комитеттин кызматкерлери Бишкек ТЭЦинде тинтүү жүргүзүшкөн.

Белгиленгендей, өткөн жылдын жайында «Электр станциялары» ААКсы Бишкек ЖЭБине көмүр жеткирүү боюнча «Инновациялык компания «Гефест»» ЖЧКсы менен тендерсиз түз келишим түзгөн. Келишим 3 миллиард 263,1 миллион сомду түзөт. “Гефесттин” ээси Жогорку Кеңештин экс-депутаты Жаныбек Абировдун атасы Болотбек Абиров экени маалымдалган.

Мындан бир нече ай мурун “Электр станциялары” тендер жарыялап, ага катышуу үчүн эки компания, «Джетта Строй ЛТД» жана «Гефест» арыздарын берген.

Компаниялар берген арызда, атап айтканда, «Гефест» 2 миллиард 92,3 миллион сомго 550 миң тонна жеткирүүгө даярдыгы айтылган. Компания Шабыркөл көмүрүн көмүр сунуштаган.

Өз кезегинде «Джетта Строй ЛТД» 34,6 миллионго аз, башкача айтканда 2 миллиард 885,7 миллион сомго сунуш кылат. Алар Жалын кенинен (Казакстандан Караганды көмүрү) Г маркасындагы көмүрдү берүүгө ниеттенишкен.

Тендердик комиссия 4 добюушка ээ болгон казакстандык компанияны жеңүүчү деп тапкан, ал эми Гефест үч добуш алган.

Бирок, «Электр станциялары» ишканасы сынактын жыйынтыгын чыгарбай, бир аздан кийин ААКда сатып алуу процедураларын уюштуруу жана ишке ашыруу эрежелери бузулду деген жүйө менен аны таптакыр жокко чыгарышкан. Ошондой эле «жашыруундуулуктун принциптери» бузулганы белгиленген.

Белгилей кетсек, козголгон кылмыш иши тууралуу УКМК расмий маалымат бере элек.

Буга чейин президент Садыр Жапаров Бишкек ТЭЦтеги жарылууга көмүрдүн тиешеси болушу мүмкүн экенин «Кабардагы» маегинде айткан.

«Биз былтыр Шабыркөл көмүрүн алганбыз. Таза көмүр, калориялуулугу 5500 Ккал/кг. Эми мен адис эмесмин. Бирок ошентсе да күчтүү көмүр экенин эске албай Кара-Кеченин көмүрүн жаккандай эле жага берип, температура көтөрүлүп кетип жарылуу болдубу деген ойдо турам», — деген президент.

Эске салсак, 2-февралга караган түнү Бишкек ТЭЦинде авария катталып, жарылуу болду. Мындан улам шаарга жылуулук жана ысык суу берүү үзгүлтүккө учурады. Азыркы тапта кырсыктын кесепетин жоюу аракеттери жүрүп, тиешелүү мамлекеттик органдардын өкүлдөрүнөн турган комиссия иштеп жатат. Жарылуудан беш адам жабыркап, азыр анын экөө оор абалда ооруканада.