Бир суткада өлкө боюнча 37 медкызматкер коронавирус жуктуруп алды. Бул тууралуу өкмөт үйүндөгү маалымат жыйында коомдук саламаттык сактоо башкармалыгынын башчысы Айнура Акматова билдирди.
«Ош шаарында 13, Ош облусунда 2, Жалал-Абадда 13, Ысык-Көл облусунда 2, Нарын облусунда 1 жана Баткен облусунда 2 медик ооруну жуктуруп алган»,-деди Акматова.
Ошол эле учурда бир суткада 5 медициналык кызматкер ооруканалардан айыгып чыккан.
Кошумчалай кетсек, жалпысынан республика боюнча COVID-19 диагнозу менен медициналык кызматкерлер арасында 2 миң 911 учур катталып, алардын ичинен 1 миң 973 медкызматкер айыкты.