АКШнын мамлекеттик катчысы Энтони Блинкен Кыргызстандын элин 31-август Эгемендүүлүк күнү менен куттуктады. Ал өз кайрылуусунда эң жакшы каалоолорун айтып, АКШнын Кыргызстандын эгемендүүлүгүн, аймактык бүтүндүгүн жана көз карандысыздыгын колдоого умтулуусун баса белгиледи.
«33 жыл бою биз Кыргыз Республикасынын эгемендигине, аймактык бүтүндүгүнө жана көз карандысыздыгына берилгендикти сактап келебиз, биз экономика жана коопсуздук чөйрөсүндө эл аралык байланыштарыбызды мындан ары да чыңдоого, ошондой эле саламаттыкты сактоо тармагындагы кызматташтыкты кеңейтүүгө жана билим берүү, климаттык көйгөйлөрдү чечүү жана “С5+1” форматы аркылуу аймактык байланышты чыңдоого умтулабыз”, — деген Блинкен.
Мамлекеттик катчы ошондой эле адам укуктарын урматтоого жана эркин коомду өнүктүрүүгө көмөктөшүүчү институттарды бекемдөө үчүн кыргыз эли жана өкмөтү менен кызматташуунун маанилүүлүгүн белгиледи.
