Бишкек.03.07.2019.Govori.TV.
«Сооронбай Жээнбеков да жоопкерчилигин сезиши керек. Момундай от менен ойноп жатып арты жаман бүтсө жоопкерчилик толугу менен азыркы президенттин мойнунда болот». Мындай пикирин мурунку президент Алмазбек Атамбаев бүгүн, 3-июлда КСДП тарабынан уюштурулган митингде сөз сүйлөп жатып айтты.
«Кудай сактасын кашык кан төгүлсө, эл бөлүнүп кетсе жоопкерчилик толук бойдон Сооронбай Жээнбековдун моюнунда. Ушуну билсин деп айтып жатам»,-деди ал.
Атамбаев өз сөзүндө 7-апрель болбогондо Жээнбековдор эч качан бийликке келбейт болчу деп кошумчалап өттү.
«Бул бийликке талаптарды коюу керек. Биринчиден бийлик тарасын. Мөөнөтүнөн мурда шайлоо өткөрсө болот, жаштарга орун берүү керек»,-деди Атамбаев.
Эске салсак, бүгүн Атамбаевдин тарапташтары тынчтык митинг уюштуруп, ага мурунку президент Атамбаев баштаган КСДПнын өкүлдөрү, ЖКнын депутаттары Карамат Орозова, Ирина Карамушкина жана башка саясатчылар катышууда.
