Чүй облусунда белгисиз бирөөлөр Европа мамлекеттеринен келген туристтерди ташып бара жаткан поездге таш ыргытышкан. Бул тууралуу «Кыргыз темир жолу» мамлекеттик ишканасы билдирди.
Окуя 8-апрель күнү саат 22:00дө Кант — Аламүдүн тилкесинде болгон. Поезд Балыкчыдан келе жаткан жана анда Европа мамлекеттеринин жарандарын ташып бара жаткан.
«Мындай аракеттер жүргүнчүлөргө олуттуу ыңгайсыздыктарды гана жаратпастан, алардын коопсуздугуна түздөн-түз коркунуч келтирет. Кыргызстандын эл аралык аброюна терс таасирин тийгизген кылмыштуу аракеттердин натыйжасында өлкөбүздүн коноктору жапа чегип жатканына жол берилбейт», — деп жазылат билдирүүдө.
Милиция окуянын бардык жагдайларын аныктоо үчүн ыкчам-иликтөө иш-чараларын жүргүзүүдө.
Темир жол линиясынын боюнда жайгашкан калктуу конуштардын жашоочулары аң-сезимдүү жана жарандык жоопкерчиликти көрсөтүүгө чакырылган.
Бул быйыл өлкөгө келген биринчи туристтик поезд.
