Бүгүн, 26-январдагы Жогорку Кеңештин жыйынында бир катар социалдык-экономикалык көйгөйлөр көтөрүлдү.
Алсак, депутат Медербек Алиев Конституцияга ылайык Кыргыз Республикасында улгайган, ооруган, майып болгон жана эмгекке жөндөмдүүлүгүн жоготкон, багар-көрөрүнөн ажыраган учурларда мыйзамда каралган тартипте жана учурларда мамлекеттин эсебинен социалдык камсыз кылуу кепилденерин айтып: “Ал эми “Кыргыз Республикасындагы мамлекеттик жөлөкпулдар жөнүндө” мыйзамынын 14-беренесинде жөлөкпулду төлөөнү токтотуунун шарттарынын 11 пункттан турган тизмеси камтылган. Ошол эле учурда, бул тизмени турмушка шайкеш келтирүү үчүн кайра карап чыгуу зарыл. Жарандардын укугу чектелип калбашы керек”, — деди эл өкүлү.