Бүгүн, 16-мартта Жогорку Кеңештин жалпы жыйынында депутат Эльвира Сурабалдиева ант берип, ыйгарым укуктарына киришти.
Анын айтымында, алдыда кыла турчу иштер көп жана талаш-тартышка көңүл буруунун мезгили эмес.
«Алдыда бир топ маселелер бар. Элдин жашоосун оңдоого багытталган иштерди жасоо керек. Шайлоого аттанганда жарандар менен пикир алышууда чогулган бир катар маселелер бар. Өкмөттө вице-премьер болуп иштеген тажырыйбам бар, ошого таянып, курулай сындар менен эмес биригип чечим чыгаруу үстүндө иштейбиз», — деди ал.
Белгилей кетсек, № 27 Биринчи май бир мандаттуу шайлоо округунда өткөн шайлоодо Эльвира Сурабалдиева жеңишке жеткен. Борбордук шайлоо комиссиясы Сурабалдиевага депутаттык күбөлүк жана төш белгини 11-мартта тапшырган.