Президент Садыр Жапаров 12-майда Ленин районунда депутаттыкка талапкерлер менен жолугушууда Кемпир-Абад окуясы боюнча кармалган активисттердин иши боюнча комментарий берди.
Президент менен жолугушууда талапкерлер суроолорун беришти. Абакта отурган Ильгиз Шаменовдун ыйгарым укуктуу өкүлү Кемпир-Абад окуясы боюнча кармалгандардын тагдыры тууралуу маселени көтөрүп, коррупция менен камалгандар акча төлөп абактан чыгып жатканын мисал кылды.
Садыр Жапаров эмоционалдуу жооп кайтарды. Президент Өзбекстан менен мамлекеттик чек араларды аныктоо боюнча келишимди кыргыз тарап үчүн пайдалуу болду деп баалады.
«Мамлекет үчүн толугу менен пайдалуу чечим болуп жатса эмнеге кодобойсуң, туура чечимди колдоп көз карашыңды, позициясыңды өзгөрт да. Сабаттуу адам биринчи кезекте документтерди изилдейт, архивге кайрылат. Бир сантиметр жер да берген жокпуз. Участкалары талашка түшкөн ондогон айылдар бар болчу, алардын айрымдары аларга өтүп кеткен. Алардын баарын Кыргызстанга кайтарып бердик. Гавасайды алдык, Унгар-Тоону алдык. Унгар-Тоо сеники эмес. СССРдин карталарында Унгар-Тоо Өзбекстандын аймагына коюлган. Ошондуктан Каримов 2016-жылы ал жерге өзүнүн танктарын койгон. Андан кийин эч ким аны танкаларды алып кетүүгө мажбурлай алган эмес. Ошондуктан бул жерлерди кайтарып бергенбиз.Тоо азыр биздики. Буга чейин Кемпир-Абад суу сактагычынын плотинасы Өзбекстандын карамагында болчу, эми 50дөн 50гө чейин башкарып, биздин айылга сууну көзөмөлдөйбүз. Оппозициянын жүйөсү, таянган фактылары болсо, анда жакшы. Анан мен да укмакмын. Бөлтүрүк келтирген зыянын төлөп берип, абактан чыкты. Ал эми Шаменовдун иши дагы бир кылмыш башка. Ал төңкөрүш жасайм деп акча таратып, блоггерлерди тартты. Бул асман менен жер», — деди президент.
