Абсолюттук мушкерлер чемпионатынын (UFC) чемпиондору орусиялык Хабиб Нурмагомедов менен америкалык спортчу Жастин Гэтжи 24-октябрда беттешет. Бул тууралуу аталган уюмдун расмий сайтында жарыяланган.
Маалыматка ылайык, беттеш UFC 254 турниринин алкагында Абу-Дабиде көрүүчүлөрсүз жана күйөрмандарсыз өтөт. Турнир ушул жекшемби күнү, 25-октябрда Бишкек убактысы боюнча саат 00:00дө түз эфирде көрсөтүлөт.
Ал эми титулдук мелдештин алдында боло турган маалымат жыйыны 21-октябрда болот. Анда мушкерлер Хабиб Нурмагомедов менен Жастин Гэтжи өздөрү катышып, суроолорго жооп беришет. Иш-чара Бишкек убактысы боюнча 19:00дө башталат.
Кошумчалай кетсек, Россиялык мушкер 28 беттеште 28 жолу жеңишке (8 – нокаут менен) жеткен, Гэтжи болсо 24 беттештин 22син жеңген.