Казакбаев Россиядагы мекендеш ишкерлер менен видеоконференция өткөрдү

Кечээ, 8-сентябрда КР тышкы иштер министри Руслан Казакбаевдин Россиянын Москва шаарындагы жана Москва облусундагы кыргыз коомдук бирикмелердин, бизнес-ассоциациялардын, диаспоралык уюмдардын өкүлдөрү, ошондой эле Москва шаарында жана Москва облусунда жашаган мекендештер менен видеоконференциясы болуп өттү. Бул тууралуу министрликтин басма сөз кызматы билдирет.

Жолугушууга ошондой эле министрликтин борбордук аппаратынын тийиштүү түзүмдүк бөлүмдөрүнүн башчылары жана Кыргызстандын Россиядагы элчилиги катышты.

Москва шаарында жана Москва облусунда, ошондой эле Россия Федерациясынын башка аймактарында — Түштүк-Сахалин, Якутск, Иркутск, Сургут, Самара, Санкт-Петербург, Калининград ж.б. шаарларында жашаган жана иштеген кыргызстандыктардын актуалдуу маселелерин жана көйгөйлөрүн талкуулоо онлайн жолугушуунуун негизги максаты болду.

Видеоконференцияны КР тышкы иштер министри Р.Казакбаев ачты жана куттуктоо сөз сүйлөдү. Өзүнүн кириш сөзүндө министр катышуу үчүн бардыгына ыраазычылык билдирди жана Кыргыз Республикасынын социалдык-экономикалык жана маданий дараметин өнүктүрүүгө кыргыз коомдук уюмдардын өкүлдөрүнүнүн жана активистердин зор салымын белгиледи. Министр коронавирус илдети менен күрөшүүдө Кыргызстанга жардам берген диаспоралардын, коомдук уюмдардын өкүлдөрүнө жана ошол учурда бардык кайдыгер эмес мекендештерге өзгөчө ыраазычылыгын билдирди.

Министр чет өлкөдө иштеп жүргөн мекендештердин көйгөйлөрүн белгилеп, аларды чечүү боюнча мамлекеттик органдар тарабынан жүргүзүлүп жаткан иштерге токтолду.

Тактап айтканда, жолугушуунун катышуучуларына «Миграциялык кырдаалды жакшыртууга багытталган чараларды кабыл алуу жөнүндө», «Жеке адамдын руханий жана адеп-ахлактык өнүгүүсү жана дене тарбиясы жөнүндө» жана «Кыргыз Республикасынын чет өлкөдө кайтыш болгон жарандарынын сөөгүн Кыргыз Республикасына репатриациялоо тартиби жөнүндө» КР президентинин Жарлыктарынын аткарылышы тууралуу кеңири маалымат берди.

Мындан сырткары, министр Р.Казакбаев Россиянын аймагында жүргөн мекендештерибиздин санынын көптүгүн белгилеп, бардыгын үстүбүздөгү жылдын 28-ноябрында боло турган КР Жогорку Кеңешинин депутаттарын шайлоого активдүү катышууга чакырды.

Онлайн жолугушуунун жүрүшүндө катышуучулар аларды кызыктырган суроолорду берүүгө, ошондой эле элчиликтин, башкы консулдуктардын жана Кыргызстандын Россиядагы элчилигинин кеңселеринин ишин жакшыртуу боюнча сунуштарды киргизүүгө мүмкүнчүлүк алышты. Жүк-200 жеткирүү, консулдук мекемелердин кызматкерлеринин санын көбөйтүү, чартердик каттамдардын географиясын жана жыштыгын кеңейтүү, Мекен Картты киргизүү жана башка маселелер талкууланды.

Ошондой эле » Россиянын ИИМнин миграция маселелери боюнча бөлүмдөрүнүн «кара тизмеси» талкууланып, ага ылайык ар кандай мыйзам бузуулар үчүн өлкөгө кирүүгө тыюу салынган. Катышуучуларды кабыл алуучу өлкөнүн бардык мыйзамдарын, үрп -адаттарын жана тартибин сактоого чакырып, министр «кара тизмеден» чыгаруу жана бул чараны айыпка же башка анча катаал эмес административдик чараларга алмаштыруу маселеси боюнча сүйлөшүүлөр улана турганын билдирди.

Социалдык коргоо жана медициналык кызматтар темасына токтолуп, министр бул багытта жетишилген натыйжаларга карабастан, эмгек мигрантарынын үй -бүлө мүчөлөрүнүн медициналык камсыздандыруу алуу маселеси ачык бойдон калып жатканын жана бул багыттагы иштер эки тараптуу жана көп тараптуу форматта — ЕАЭБ алкагында улантыларын баса белгиледи.

Ар бир суроого Тышкы иштер министрлигинин башчысы, Консулдук департаменттеринин жана Тышкы миграция департаментинин жетекчилери, ошондой эле КРнын РФдагы элчилигинин кызматкерлери толук жоопторду беришти. Мекендештердин кайрылуулары негизинен министр тарабынан көзөмөлгө алынды жана алар элчилик жана министрликтин тиешелүү түзүмдүк бөлүмдөрүнүн жетекчилери тарабынан жеке чечилет.

Жыйынтыгында жолугушуунун катышуучулары министрге видеоконференцияны уюштургандыгы үчүн ыраазычылык билдиришти, ошондой эле бул форматтагы жолугушуулар мындан ары да улантыла беришине үмүт артышты.

Өз кезегинде, министр Р.Казакбаев мекендештерге онлайн жолугушууга катышкандыгы үчүн ыраазычылык билдирип, Кыргызстандын эгемендүүлүгүнүн 30 жылдыгы менен куттуктап, ден соолук каалады жана мындай жолугушууларды салтка айлантуу ниетин билдирди.