Казакстандын Актөбө облусунда жайгашкан Жанажол кениндеги газды кайра иштетүүчү заводдо чыккан өрттөн жабыркаган эки жумушчу 14-майда ооруканада каза болду.
Заводдо өрт 1-майда катталып, күйүк алган төрт киши ооруканага жеткирилген.
Актөбө облустук саламаттык сактоо башкармалыгынын маалыматына караганда, 56 жаштагы Рахымжан Рысбеков 14-майда Астана шаарындагы ооруканада көз жумду. Ал денесинин 70-75% күйүк алып, баш калаага тик учак менен жеткирилген.
Ушул эле күнү денесинин 70% күйүк алган 52 жаштагы Мырзалы Куанышалиев да ооруканада каза болду.
Жергиликтүү бийликтин маалыматына ылайык, «СНПС-Актөбөмунайгаз» компаниясына таандык заводдогу өрт жеңил көмүр суутек алуучу жайда тутанган.