Кадамжай районунда каза болгон мектеп окуучусу үй-бүлөдө жалгыз кыз болгон. Бул тууралуу Super.kg маалымат порталына кыздын атасынын тууганы Үсөн Мурзадиллаев билдирди.
Анын айтымында, өспүрүмдүн ата-энеси Орусияга 20 күн мурун кеткен, кыз чоң энеси менен жашаган.
«Окуя болгон күнү кызды эртең менен саат 9.30дар чамасында көрүшкөн. Саат 10:00дө ал Instagramга кирген. Кылмыштын өзү саат 11.00-12.00 чамасында болгон. Ата-эненин абалы азыр сөз менен жеткиргис. Баары күндүз болсо да, эмне болуп жатканын бир дагы адам көрбөй калганы өкүнүчтүү. Күнөөлүүлөр жоопкерчиликтен качпай, мыйзам чегинде жазасын алышын каалайбыз», — дейт Үсөн Мурзадиллаев.
Эске салсак, Кадамжай районунда үч эркек окуучу кызды мыкаачылык менен өлтүргөн деп шектелүүдө. Кыздын денесинде зордук-зомбулук менен өлүмдүн издери калган — аны муунтуп өлтүрүшкөн, колдору артка байланган. Бул окуя тууралуу билдирүү жазган президент Садыр Жапаров ишти өз көзөмөлүнө алганын кабарлады.
