«Мамлекеттин кызыкчылыгы үчүн мыйзамдагы ууруну жок кылуу чечимин кабыл алууга туура келди». Бул тууралуу министрлер кабинетинин төрагасынын орун басары – УКМКнын төрагасы Камчыбек Ташиев жогорку билим берүү системасынын кызматкерлери менен жолугушууда билдирди.
«Уюшкан кылмыштуулуктун мамлекеттик системага окшош структурасы болгон: «президенти» — мыйзамдагы ууру жана облус, район, шаарларда «смотрящий», «положенецтер» болгон, алар ишкерлерден жана башкалардан акча чогултушкан. Аларда абдан күчтүү структура болгон. Бизге мажбур түрдө чара көрүүгө туура келди. Сиздерди ишендириш үчүн чындыкты айтайын, мага мыйзамдагы ууруну жок кылуу чечимин кабыл алууга туура келди. Түшүнүп жатасыздарбы? Мамлекеттин кызыкчылыгы үчүн. Мен бул чечимди кабыл алдым жана биз аны жок кылдык. Андан кийин анын шериктерин, уюшкан кылмыштуулуктун башка мүчөлөрүн жок кылдык. Бүгүнкү күндө өлкөдө уюшкан кылмыштуулук жок», — деди Ташиев.
Эске салсак, кримавторитет Камчыбек Асанбек (Камчы Көлбаев) 2023-жылдын 4-октябрында Бишкектин Ибраимов көчөсүндө жайгашкан Blonder Pub ресторанында атайын операция учурунда жок кылынган.
Тергөөнүн версиясы боюнча, уюшкан кылмыштуу топтун лидери УКМК кызматкерлеринин мыйзамдуу талаптарына көңүл бурбастан, ок атуучу куралдарды колдонуу менен куралдуу каршылык көрсөткөн.
