З. Курманов: Акрамов бүт өмүрүн элге кызмат кылууга арнады

Эрнст Акрамовду акыркы сапарга узатылды. Иш-чара бүгүн, 27-ноябрда Абдылас Малдыбаев атындагы Кыргыз улуттук академиялык опера жана балет театрында өттү.

Ага Министрлер Кабинетинин Төрагасынын орун басары Эдил Байсалов баштаган өкмөт мүчөлөрү, ЖК депутаттары, коомдук, саясий ишмерлер, замандаштары жана жакындары катышты.

Акыркы сапарга узатуу зыйнатында сөз сүйлөгөн Жогорку Кеңештин мурунку төрагасы Зайнидин Курманов Акрамов өз өмүрүн толугу менен элге кызмат кылууга арнаганын айтты.

Курманов Акрамовдун үй-бүлөсү анын шакирттери, бейтаптары, эли болгонун белгиледи.

Окумуштуу-хирург, мамлекеттик жана коомдук ишмер, медицина илимдеринин доктору, профессор Эрнст Акрамов 89 жаш курагында көз жумду.

Эрнст Хашимович 1936-жылы 24-июнда Фрунзеде жарык дүйнөгө келген. 1960-жылы Кыргыз мамлекеттик медициналык институтун артыкчылык диплому менен аяктап, хирург дарыгери катары өзүнүн карьерасына баштап, республикадагы кадыр-барктуу адистердин бири болду. 1992-жылы Чүй облустук ооруканасынын жалпы хирургия бөлүмүн жетектеп, аны алдыңкы медициналык мекемеге айландырды. 2023-жылы ооруканага анын урматына ысмы ыйгарылды.

2002-жылдан бери Акрамов Реконструктивдүү жана калыбына келтирүүчү хирургия илимий борборун жетектеп, дарылоонун инновациялык ыкмаларын киргизди. Ал илимдин 17 докторун жана кандидатын даярдап, 350дөн ашык илимий эмгек жазып, 23 патент алган.

Анын медицинага кошкон салымы көптөгөн сыйлыктар менен бааланган, анын ичинде «Алтын шумкар» медалы, «Данакер» ордени, Н.Пирогов ордени, Мустафа Кемаль атындагы алтын медаль жана башка көптөгөн сыйлыктар бар. Акрамов КМШда «Жылдын адамы» жана «Кыргызстанда 2004-жылдын дарыгери» деп табылган.