Жалал-Абад облусунда нефть куюучу жайдан чыккан өрт өчүрүлдү. Бул тууралуу ӨКМ кабарлады.
Маалыматка ылайык, 6-июнь күнү Майлуу-Суу шаарына караштуу Көк-Таш айыл аймагынын Катыраңкы тилкесинде «Кыргызнефтегаз» ААКнын нефть куюучу цистернасынан өрт чыккандыгы тууралуу маалымат саат 15:52де түшкөн.
Тилсиз жоону өчүрүүгө жалпы 2 бөлүм тартылып, саат 16:30да чектөөгө алынган. Өрт саат 16:35те толугу менен өчүрүлгөн.
Азыркы тапта өрттүн чыгуу себептери жана келтирилген материалдык чыгымдар такталууда. Алдын ала маалымат боюнча, жабыркагандар жок.