Абдишүкүр ажы Нарматов кыргыз-тажик элин биримдикке чакырды. Бул тууралуу видео социалдык тармактарга жарыяланды.
Маалыматка караганда, ал Баткен облусуна барат. Ажы буга чейин эки эл ынтымакта жашаганын баса белгилеген.
30-апрелдеги акыркы маалымат боюнча, кыргыз-тажик чек арасындагы жаңжалдан каза болгон кыргызстандыктар 13кө жетти. Көз жумгандардын арасында 3 аскер кызматкери бар. Жараат алгандардын жалпы саны 134 адам. Алардын 25ин атайын учак менен Баткенден Бишкекке алып келишти. Учурда эки өлкөнүн бийлик өкүлдөрү кырдаалды жөнгө салуу аракетин көрүп жатат.
