Казакстандын Атырау облусунда 10 облустан барган куткаруучулар тобу, анын ичинде Өзгөчө кырдаалдар министрлигинин (ӨКМ) аскер бөлүктөрүнүн кызматкерлери иштеп жатат. Бул тууралуу шейшембиде өлкө ӨКМинин басма сөз кызматы билдирди.
«ӨКМ кызматкерлери Жайык дарыясындагы суунун деңгээлин саат сайын көзөмөлдөп турушат. Суу каптаган аймактардан суу сордуруу иштери күнү-түнү уланууда», — деп айтылат билдирүүдө.
Мындан бир күн мурда казак өкмөтү «бардык күчтөрдү мобилизациялоо», суунун деңгээлине саат сайын мониторинг жүргүзүү, коргоочу дамбаларды бийиктетүү жана суу ташкындарынын алдын алуу зарылдыгын билдирген. Маалым болгондой, Атырау облусунда куткаруу иштерине 13 миңден ашык адам жана 1200дөн ашык техника тартылган.
Казакстандын Өзгөчө кырдаалдар министрлиги билдиргендей, 30-апрелге карата Күлсары шаарындагы 2 564 турак жай суудан тазаланды.
Жарандык коргонуу кызматтарынын өкүлдөрү менен ыктыярчылар Атырау, Актөбө, Батыш Казакстан жана Түндүк Казакстан облустарында селди жоюу жана калкка жардам көрсөтүү иштерин улантууда.
Республика боюнча жети миңден ашык жеке менчик турак жайдан жана 2,8 миңге жакын короо-сарайдан суу чыгарылып, 39 миңден ашуун адам өз үйлөрүнө кайтты. Дагы 6 552 адам эвакуациялоо борборлорунда калууда.
Куткаруу жана суу ташкындарын алдын алуу иштерине жалпысынан 17 миңден ашык адам жана эки миңге жакын техника тартылган.
