«Бүтүн Кыргызстан» партиясы активист, аталган партиянын мүчөсү Орозайым Нарматованы укук коргоо органдарынын кызматкерлери Ош аэропортунан кармап кеткенин 10-сентябрда билдирди.
Партия Нарматованын кармалышын саясий куугунтук катары баалайт.
«Өлкөбүздөгү мыйзамсыздыктарга, акыйкатсыздыктарга өз ой-пикирин билдирген жараныбыз, партиялашыбыз Орозайым Нарматованы бүгүн эртең менен саат 05:00 тегерегинде Ош аэропортунан укук коргоо органдары кармап кеткени белгилүү болду. Бийликтин бул аракети сөз эркиндигине болгон чоң сокку», — деп билдирет партия.
Ички иштер министрлиги жана башка укук коргоо органдары маалымат бере элек.
Кошумчалай кетсек, Орозайым Нарматова Орусияда иштеген эмгек мигранты. 2020-жылы өткөн парламенттик шайлоодо «Бүтүн Кыргызстан» партиясынын алдыңкы ондук тизмесине кирип, шайлоого барган.