Ош — Баткен — Исфана жолунда HOWO унаасы кырсыкка учурап, жүктөп бара жаткан күйүүчү майдын 5 тоннасы жолго төгүлдү. Бул тууралуу Sputnik Кыргызстан агенттигине айдоочу өзү билдирди.
Маалыматка караганда, Оштон Лейлекке бара жаткан унаа эртең менен саат тогуздар чамасында Баткендин Мин-Булак айылында кырсыкка учураган.
«Мен өз жолумда кетип бара жатканда артымдагы Honda Accord унаасынын айдоочусу кууп өтүүгө аракет кылды. Ага жол берүүгө аракет кылып, рулду буруп жибергенде жол жээгиндеги тосмого унаам жарым-жартылай чыгып кетти. Ичинде беш адам бар жеңил машинанын айдоочусу токтобостон качып кетти», — деди айдоочу Малик Токтобаев.
Кырсык болгон жерге Баткен облустук Жол кыймылынын коопсуздугун көзөмөлдөө бөлүмүнүн кызматкерлери жана ӨКМдин куткаруучулары барган.
Жол кыймылынын коопсуздугун көзөмөлдөө бөлүмүнүн үгүт-насаат тобунун тескөөчүсү Чолпонбай Арстанбековдун айтымында, унаага 29 жана 9 тонналык эки цистерна чиркелген.
«Биринчи цистерна жабыркаган жок. Экинчиси тешилип калып, беш тоннадай май төгүлүп калды. Калганын улам бир идишке куюп жатып алып калдык», — деди Арстанбеков.
Алдын ала маалыматтарга караганда, кырсыктан жабыркагандар болгон жок.
Булак: Спутник
