III Бишкек эл аралык кинофестивалында эң мыкты тасмага Жаабарс сыйлыгы ыйгарылат. Бул тууралуу Маданият, маалымат жана жаштар саясаты министрлигинен билдиришти.
“1994-жылдан бери илбирс Бишкек шаарынын расмий символу болуп келет. Ал кыргыз элинде ыйык жаныбарлардын бири катары белгилүү.
Бишкек эл аралык кинофестивалында Жаабарс сыйлыгы эң мыкты фильмге ыйгарылышы — бул кино искусствосундагы эң жогорку жетишкендиктерди белгилөө жана табият, искусство менен улуттук мурастын терең байланышын даңазалоо.
Жаабарс — бул жөн гана сыйлык эмес. Бул — тарых, өзгөчөлүк, күч”, — деп айтылат маалыматта.
Белгилей кетсек, Бишкек шаарында 11-15-июнь күндөрү III Бишкек эл аралык кинофестивалы өтөт. Анда дүйнөлүк тасмалар көрсөтүлүп, форумдар, атайын көрсөтүүлөр, мастер-класстар өткөрүлөт.
