Бишкек шаарындагы Байтик баатыр көчөсүндө айдоочу аялга кол салган эркек кишинин аты-жөнү такталды. Бул тууралуу Биринчи май РИИБдин басма сөз кызматы кабарлайт.
Маалымат боюнча, 28-сентябрда жабырлануучу арыз менен кайрылган.
Соцтармакка тараган видеодо автоунаанын ичинде отурган аял кишиге сыртта турган эркек киши терезе аркылуу кол көтөрүп, жулмалап жатканын көрүүго болот.
Факт Жоруктар кодексинин 119-беренеси («Майда бейбашчылык») менен Кылмыштар жана жоруктардын бирдиктүү реестрине катталган.
«Денеге келтирилген жаракаттын деңгээлин аныктоо үчүн соттук-медициналык экспертиза дайындалды. Анын жыйынтыгы менен юридикалык баа берилет», — деп айтылат маалыматта.
Майда бейбашчылыкка айыпталган айдоочу — 1964-жылы туулган Э.Н. Биринчи май РИИБге жеткирилгени белгилүү болду.