Бишкекте ок атуу менен коштолгон мушташтан кийин милицияга 9 адам жеткирилди.
Ленин РИИБден билдиришкендей, 13-майда болжол менен саат 18:26да милициянын «102» кызматына Жаш Гвардия бульвары менен Фрунзе көчөсүнүн кесилишинде муштап болуп жатканы жана тапанчадан ок атылганы тууралуу маалымат түшкөн.
Ыкчам-издөө иштеринин натыйжасында шектүү катары милицияга 9 жаран жеткирилген. Алардын арасында жашы жете элек бала бар.
Аталган окуяга байланыштуу Кылмыш-жаза кодексинин 280-беренеси (бейбаштык) боюнча кылмыш иши козголгон.
Милициядан билдиришкендей, мушташ учурунда асманга ок атылган травматикалык тапанча шектүүлөрдөн алынып, далил зат катары таанылган. Ал боюнча тиешелүү экспертизалар дайындалды.