Депутат Чыныбай Турсунбеков каза болду

Жогорку Кеңештин депутаты Чыныбай Турсунбеков каза болду.  Бул тууралуу Kaktus. media сайты жазды.

Буга чейин депутат Чыныбай Турсунбеков пневмонияга чалдыгып, дем алдыруучу аппаратка туташтырылганы маалымдалган.

Ал 1960-жылдын 15-октябрында Нарын облусунун Нарын районундагы Жан-Булак айылында туулган.

Жогорку билимдүү. 1983-жылы Кыргыз мамлекеттик университетин бүтүргөн. 1985-1988-жылдары Кыргыз илимдер академиясынын аспирантурасында окуган. 1988-жылы кандидаттык диссертациясын жактап, филология илимдеринин кандидаты наамын алган. 2004-жылы Тышкы иштер иинистрлигинин алдындагы Дипломатиялык академияны артыкчылык диплому менен бүтүргөн.

Эмгек жолун 1983-жылы «Кыргызстан» басмасынын саясий адабияттар редакциясында редактор, улук редактор болуп иштөө менен баштаган.

1989-1992 — КМУнун кыргыз филологиясы жана журналистика факультетинде окутуучу, ага окутуучу, факультеттин деканынын орун басары;

1993-1994 — Билим берүү министрлигинин Түркиядагы өкүлү;

1995-1997 — Түркиянын Тышкы иштер министрлигинин алдындагы ТИКАнын Кыргызстан боюнча адиси, «Манас-1000» мамлекеттик комитетинин алдындагы «Манас дастаны» филиалынын директору, Түркия боюнча «Азаттык» радиосунун кабарчысы.

1997-жылдан 2010-жылга чейин — «Акун» ЖАКтын башкы директору, «Бишкек ун комбинаты»ААКнын башкы директору, «Кереге» ишканасынын Директорлор кеңешинин төрагасы, Кыргызстан ишкерлер бирлигинин президенти, Кыргыз-түрк ишкерлер кеңешинин тең төрагасы;

2010-жылы — Кыргызстан социал-демократиялык партиясынын тизмеси боюнча V чакырылыштагы Жогорку Кеңештин депутаты болуп шайланган. КСДП парламенттик фракциясынын лидери;

2015 — КСДП партиясынын тизмеси боюнча VI чакырылыштагы ЖК депутаты. КСДП парламенттик фракциясынын лидери. Жогорку Кеңештин көпчүлүк коалициясынын жетекчиси;

04.2016-25.10.2017 — Жогорку Кеңештин төрагасы.

Govori.TVнын жамааты Турсунбековдун жакындарына көңүл айтып, аза кайгысын тең бөлүшөт.