Бишкек.26.01.2019.Govori.TV.
9-февраль күнү Бишкекте Футбол федерациясынын президенти шайлана турганын Sputnik Кыргызстан агенттигине аталган жайдан билдиришти.
Федерациянын учурдагы жетекчиси Семетей Султанов 10-январь күнү кызматтан кетүү ниетин жар салган.
Уюмдун маалымат кызматынын билдиргенине караганда Султанов 9-февралга чейин федерацияны башкара бермекчи. Бул күнү борбор калаада уюмдун конференциясы өтүп, ага аймактагы өкүлдөр катышат. Иш-чарада президенттикке талапкерлер аныкталып, алар өз программаларын сунуштап, андан соң шайлоо процедурасы өтөт.
Султанов эмне себептен отставкага кеткени белгисиз. Ага чейин Азия футбол конфедерациясынын вице-президенттигине талапкер болуп жатканы айтылган. Шайлоо апрелде өтөрү белгилүү.
Семетей Султанов Баңгизатты көзөмөлдөө боюнча мамлекеттик кызматтын мурдагы жетекчиси Алымбай Султановдун уулу жана экс-президент Алмазбек Атамбаевдин күйөө баласы экени маалым.
