Күйүүчү-майлоочу майлардын баасына убактылуу чектөө киргизилди

КР Министрлер кабинети күйүүчү-майлоочу материалдардын баасын турукташтыруу боюнча убактылуу чараларды киргизди. Тиешелүү токтом 2026-жылдын 25-майынан тарта күчүнө кирди, ага Министрлер кабинетинин башчысы Адылбек Касымалиев кол койду. Ошентип, Министрлер кабинетинин пландарында күйүүчү май импортуна субсидия берүү, чекене бааларды жөнгө салуу жана мунай трейдерлери үчүн акциздерди төлөө мөөнөтүн өзгөртүү бар.

2026-жылдын 25-майынан 30-сентябрына чейин Күйүүчү-майлоочу майларды импорттоочуларга жана сатуучуларга субсидиялар берилет. Министрлер кабинети темир жол станцияларына жеткирүү базисинде төмөнкүдөй белгиленген бааларды бекитти:

Бензин АИ-92 – тоннасы 860 доллар;

Бензин АИ-95 – тоннасы 940 доллар;

Дизель майы – тоннасы 950 доллар;

Суюлтулган углеводород газы – тоннасы 575 доллар.

Экономика министрлигине күйүүчү майга максималдуу чекене бааларды белгилөө тапшырылды, анткени бийлик бир эле учурда күйүүчү-майлоочу майлардын баасын убактылуу мамлекеттик жөнгө салууну киргизүүдө.

Социалдык маанидеги товарлардын тизмесине эми АИ-95 маркасындагы бензин киргизилди. Буга чейин тизмеге АИ-92 гана кирген.

Мамлекеттик салык кызматына бензинге, дизель майына жана газга акциздерди төлөө мөөнөтүн кийинки айдын 20сына чейин жылдыруу тапшырылды. КР Финансы министрлигине субсидияларды каржылоого каражат табуу жана бөлүү тапшырылды.

Ошондой эле Министрлер кабинети автомобиль транспорту менен мунайдын жана мунай продуктуларынын айрым түрлөрүн алып келүүгө тыюу салуунун аракетин убактылуу токтотту. Чектөөлөр 2026-жылдын 30-сентябрына чейин иштебейт.