АФК (Азия футбол конфедерациясы) Чемпиондор лигасынын тайпалык оюндарынын алтынчы турунда Душанбенин «Истиклол» клубу Сауд Арабиянын «Аль-Наср» командасы менен беттешет.
«Е» тайпасындагы эки команданын бул оюну 5-декабрда Душанбедеги Борбордук стадиондо өтөт.
«Истиклол» клубунун басма сөз катчысы Рустам Хакимовдун айтымында, «Аль-Насрдын» оюнчулары Тажикстандын баш калаасына 4-декабрда келет деп күтүлүүдө.
«Команданын бардык мүчөлөрү Тажикстанга келүү үчүн виза алышты. Ал тизмеде Криштиану Роналду да бар. «Аль-Насрдын» капитаны Душанбедеги Борбордук стадиондун оюн талаасына чыгып, футбол күйөрмандары аны жакындан көрө алат деп үмүттөнөбүз», – деди Хакимов.
Тайпалык оюндардын экинчи турунда «Аль-Наср» менен «Истиклол» 2-октябрда Эр-Рияд шаарында кез келип, тажик командасы 3:1 эсебинде утулуп калган. Анда ал беттешти сыналгыдан 200 миллиондон ашык киши көргөнү кабарланып, бул АФК Чемпиондор лигасынын тарыхындагы рекорд болгону белгиленген.
Учурда «Е» тайпасында 13 упайы менен «Аль-Наср» биринчи орунда келе жатат. Ал Чемпиондор лигасынын плей-офф бөлүгүнө мөөнөтүнөн мурда чыкты.
Экинчи орунга сегиз упайы менен Ирандын «Персеполис», үчүнчүгө төрт упай менен Катардын «Аль-Духайл» командасы жайгашса, Душанбенин «Истиклол» клубу эки упайы менен акыркы сапта.
