Кыргыз продукцияларын Wildberriesде сатуу мүмкүнчүлүктөрү талкууланды

3-октябрда Бишкекте өткөн семинарда кыргыз продукцияларын Wildberries платформасында сатуу мүмкүнчүлүктөрү талкууланып, жергиликтүү өндүрүүчүлөрдүн эл аралык рынокторго чыгуу жолдору тууралуу сөз болду. Иш-чара Агрардык өнөр жай комплексин өнүктүрүү ассоциациясынын жана Суу ресурстары, айыл чарба жана кайра иштетүү өнөр жай министрлигинин колдоосу менен өткөрүлдү.

Негизги акцент өндүрүүчүлөрдүн маркетплейске чыгуу үчүн алышы керек болгон зарыл документтер жана сертификаттоо процесстери тууралуу болду. Продукциялардын сапатына жана коопсуздугуна коюлган негизги талаптар түшүндүрүлдү.

Катышуучулар Wildberries стандарттарына ылайык келген таңгактоо жана маркалоо боюнча сунуштамаларды үйрөнүштү. Айрыкча, товарларды кантип сертификаттап жана декларациялоо керектиги жөнүндө маалымат берилди.

Семинар кыргызстандык азык-түлүк өндүрүүчүлөрүнө эл аралык рынокто иштөө үчүн практикалык жардам көрсөттү, анын ичинде продукцияларын экспорттоо маселелери каралды.

Семинардын катышуучусу, Wildberries платформасында биологиялык жер семирткичтерди саткан Ярослав Белый мындай деп белгиледи:

«Бул тренинг башталгычтар үчүн абдан пайдалуу болду, өзгөчө минималдуу салым менен баштоону каалагандар үчүн. Мисалы, биз Wildberries платформасында биологиялык жер семирткичтерди 3 айдан бери ийгиликтүү сатып келебиз жана дыйкандарыбызга жардам берип, айыл чарбаны андан ары өнүктүргүбүз келет».

Жергиликтүү өндүрүүчүлөрдү окутуу жана колдоо Wildberries платформасында бизнесин ийгиликтүү өнүктүрүү үчүн чоң роль ойнойт. Кыргыз Республикасында бекер семинарлар үзгүлтүксүз негизде өткөрүлүп турат.