Жогорку Кеңештин депутаты Адахан Мадумаров сурактан чыкты. Ал журналисттердин суроолоруна жооп берип, 24-январь күнү саат 10:30да кайра суракка келерин айтты.
«Бул өлкөдө мыйзамдуулук түп тамыры менен жоюлуп баратат. Мынчалык деңгээлге эч качан түшкөн эмес. Акырети жакшылык болсун деп айткым келет. Бирок чыдамды кайра-кайра сынай бергендин дагы чеги болуш керек. Бир берген суроону мага 205-жолу берүүнүн кажети жок. Дүйшөмбү күнү кайра суракка чакырышты»,-деди ал.
Белгилей кетсек, Мадумаров Коопсуздук кеңешинин катчысы кезинде 2009-жылы кол койгон кыргыз-тажик чек арасы тууралуу протоколго байланыштуу күбө катары суракка чакырылууда.