Бишкекте митингден кийин бир тонна таштанды чыгарылды. Бул тууралуу «Тазалык» ишканасынан билдиришти.
«Аянтта 25 кызматкер жана эки техника иштеди. Эл тарагандан соң 1 тонна таштанды чыгарылды. Көбүнесе кагаз, желим баштык, бөтөлкөлөр жана таштар»,-деп айтылат маалыматта.
Эске салсак, бүгүн Бишкектеги борбордук аянтта камактагы Садыр Жапаровдун тарапташтары митинг өткөрдү. Кечке маал алар Ак үйдү көздөй бет алганда, милиция күч менен кууп таркатты. Ошондой эле милиция келтирилген чыгымдар эсептелип жатканын билдирди.