Бишкек. 08.02.2019. Govori.TV.
Москванын батышында өрт болуп, кичикий балдар жаракат алган. Тергөө иштери жүрүүдө. Бул тууралуу “Москва” шаардык маалыматтар агенттиги укук коргоо органдарындагы булактарга шилтеме берип кабарлайт.
Маалыматка ылайык, 6-февраль күнү Родниковая көчөсүндөгү курулушта өрт чыккан. “Өрт болуп жаткан жерден куткаруучулар эки кичинекей кызды алып чыгышкан. 7 айлык ымыркайдын колу жана бети күйгөн, ал эми анын 3 жаштагы эжекесинин бети, кулактары, колдору жана таманы күйүп калган. Балдар кайра жандандыруу бөлүмүнө жеткирилген”, — деп айтылат маалыматта.
Алдын ала маалыматтарга ылайык, өрттүн себеби – электр жабдууларын колдонуудагы коопсуздукту сактабагандыктан келип чыккан.
Жабыркаган кыздардын ата-энесинин өздүгү такталган. Алар 30 жаштагы жана 22 жаштагы Кыргызстандын жарандары. Алар Москванын 3-Михайловск проездинде жашагандыгы такталган.
Учурда Тергөө комитети өрттүн чоо-жайын жана кандай себептер менен балдар жалгыз вагондо болгондугун териштирүүдө.
