Төрөхан Жунусбековдун эмгек өргүү алып, Жапаровду үгүттөп жүргөнү сындалууда

«Альфа Телеком» компаниясынын директорунун кеңешчиси Төрөхан Жунусбековдун президенттикке талапкер Садыр Жапаровду үгүттөп жүргөнү сынга алынды.

Жергиликтүү маалымат каражаттарынын жазганына караганда, Жунусбеков 14-декабрдан тарта эмгек өргүүсүнө чыккан.

Борбордук шайлоо комиссиясынын мүчөсү Гүлнара Журабаева, ошондой эле Фейсбуктун башка колдонуучулары Жунусбеков «MegaCom» мамлекеттик компаниясынын башкы директорунун кеңешчиси болуп туруп, «Шайлоо жөнүндө» конституциялык мыйзамдын 15-бөлүгүнүн 22-беренесин бузгандыгын айтышууда.

Төрөхан Жунусбеков «Мегакомдун» жетекчисине кеңешчи болуп, 8-декабрда дайындалган. Буга чейин ал Бишкектин мэри болууга ниетин билдирип, нааразылык акцияларына катышкан.