Тажикстанда сөөгү 11-декабрда Каферниган дарыясынан табылган 16 жаштагы кыздын өлүмү боюнча териштирүү иштери башталды. Бул тууралуу «Озоди» радиосу кабарлады.
Маалыматка караганда, тергөөчүлөр Нозия Исмонзоданын өз жанын кыйган-кыйбаганын тактап жатышат.
Кыздын жоголгону тууралуу алгач социалдык түйүн колдонуучулары жазып чыгышкан. Алардын билдирүүлөрүнө ылайык, мунун алдында кыз дарыянын жээгинде туруп видео-кайрылуу жасап, аны мессенжер аркылуу тааныштарына жөнөтүп жиберген.
Тажикстандын Өзгөчө кырдаалдар комитети Файзабад районунда жашаган Нозия Исмонзоданын сөөгү ал дарыяга кулагандан беш күн өткөндөн кийин табылганын билдирди.