• Дүйшөмбү 15 Чын куран 2024
  • Понедельник 15 Апрель 2024

Ысык-Атада «Кадастр» мамлекеттик мекемесинин директору кармалды

17 Бирдин айы 2024 13:11 Бишкек Govori.TV

Ысык-Ата районунун «Кадастр» мамлекеттик мекемесинин директору М. М. А. кармалды. Бул тууралуу УКМКнын басма сөз кызматы билдирди.

Маалыматка ылайык, КР УКМК тарабынан жер тармагындагы коррупциялык көрүнүштөрдү жоюу боюнча жүргүзүлгөн ыкчам-издөө иш-чараларынын жүрүшүндө, 2001-2022-жылдар аралыгында Чүй токой чарбасы жана Чүй-Токмок «Кадастры» тарабынан 150 гектардан 4 сотука чейин аянттан 226 бирдик жер тилкелерине мамлекеттик актылар мыйзамсыз берилген.

Аталган фактыларды текшерүүнүн жүрүшүндө, УКМК тарабынан «Кадастр» мамлекеттик мекемесинин жана Чүй токой чарбасынын кызматкерлерине, 1992, 1996, 1999, 2006-жылдарында «Көл-Төр» багбанчылык шериктештигинин жана Чүй токой чарбасынын эмгек жамаатынын кеңешинин жасалма протоколдорун пайдалануу менен Кегети «Көл-Төр-1» токойчулугунун жана Токмок «Көл-Төр-2» токойчулугунун аймагында жайгашкан дача тилкелерин мыйзамсыз берүү фактысы боюнча кылмыш иши козголгон.

Жыйынтыгында жалпы баасы 115 млн 632 миң сомду түзгөн, 33,8 гектар жерге жеке менчик укугу боюнча 39 мамлекеттик акт мыйзамсыз берилгендиги аныкталды.

2024-жылдын 15-февралында бул факты боюнча тергөө амалдары жүргүзүлүп, Кыргыз Республикасынын Жазык-процесстик кодексинин 96-беренесине ылайык, Ысык-Ата районунун «Кадастр» мамлекеттик мекемесинин директору М.М.А. кармалып (мурда Чүй-Токмок «Кадастр» мамлекеттик мекемесинин директору болгон), УКМКнын тергөө абагына киргизилди.

Учурда бул ишке тиешеси бар башка адамдарды аныктоо боюнча ыкчам-тергөө иш-чаралары жүргүзүлүүдө.

Количество просмотров: 244